Þjóðlagasetrið á Siglufirði

madomuhus_teikning

Opnunartímar: Júní til ágúst: kl. 12.00 – 18.00.

Vetraropnun samkvæmt samkomulagi. Vinsamlegast hringið í síma 898 0270.

 

Þjóðlagasetrið á Siglufirði er staðsett í einu elsta húsi Siglufjarðar. Í því eru  íslensk þjóðlög kynnt á aðgengilegan og skemmtilegan hátt. Þar er boðið upp á myndbönd af fólki á öllum aldri sem syngur, kveður eða leikur á hljóðfæri. Sagt er frá þjóðlagasöfnun sr. Bjarna Þorsteinssonar (1861 – 1938), greint frá heimildarmönnum hans og mörgum þeim sem aðstoðuðu hann við söfnunina víða um land.

Þjóðlagasetrið hefur staðið fyrir söfnun þjóðlaga i góðum mynd- og hljóðgæðum, hjá  fjölmörgum Íslendingum af öllu landinu frá árinu 2005.  Nú er svo komið að búið er að safna mörg hundruð kvæðalögum, barnagælum og þulum, sálmum og „druslum“, hjá síðustu kynslóðinni sem lærði að kveða rímur eða syngja þjóðlög af forfeðrum sínum. Landmark-kvikmyndagerð hefur séð um upptökur en Gunnsteinn Ólafsson stjórnað þeim. Í þjóðlagasetrinu er hægt að skoða þetta efni.

Í þjóðlagasetrinu eru munir úr búi sr. Bjarna Þorsteinssonar og Sigríðar Blöndal konu hans. Þar má einnig sjá sýnishorn af handritum sr.  Bjarna, bæði þjóðlög og eigin tónsmíðar. Þar eru hljóðfæri sýnd og almennur fróðleikur settur fram á lifandi hátt.

Þjóðlagasetrið á Siglufirði var vígt við hátíðlega athöfn af herra Ólafi Ragnari Grímssyni forseta, þann 8. júlí 2006.

Þjóðlagasetrið hefur staðið fyrir eða komið að útgáfu á efni frá þjóðlagasetrinu á DVD diski  (Raddir Íslands), ævisögu sr. Bjarna Þorsteinssyni og námsefni í tónfræði. Nánar má sjá upplýsingar hér.

Þjóðlagasetrið stendur að árlegri þjóðlagahátíð fyrstu heilu vikuna í júlí, en auk þess eru haldnir sumartónleikar, sjá hér.